Gabaygii:Ruugmaraar

"Waxaan dhegta ku hayay mobile aan markaas ka sugayay warka fiidnimo balse waxaa si kadisa usoo galey barnaamij aan u riyaaqay se aanan filaynin ,waa majaajilo ka sakow maaweelo iyo qosol ahayd mid dhacda iyo xaqiiqo ku qotantay, waa oday iyo wiil dhalinyara ah oo isku raada isku wadana ku saylaamaya, wuxuu gacanta kor ugu hayaa waa odaygee rikoor uu markaas dhagaysanayay wiilkuna dheegiisa ayuu taxaabaya si aan degdeg iyo degsiimo ku jirin wuxuuna marba mar dhegta u raaricinayaa si sharqan li'iyana u dhagaysanayaa barnaamij xiiso iyo xamaasad gooniya lahaa markaa  si riwaayadana loo soo tabinayay lagana matalayay is barbardhiga dhalinyarada iyo waayeelka midka dalka aan u roonaan oo la kala darane daano badan,

 markay uu ay ka baxday majaajiladii maldahaada iyo macnaha guntanayd ayaan isla judhiisa holaday inaa curiyo tixdaas aan ugu wanqalay (Ruugmaraar) oo ka sakow qisadaa ay ku farshaxamaysantahay ee wiilka iyo odayga dhex martay huwan duluc gubaabin iyo walaalayna

Waxayna tiri" :

Ruugmaraar socodiyo wiil yar baa waa rafiiqtamaye

Rug maqaayad lagu shaaho bay dhex iska raaceene

Radiyowgii wararkaa dalkiyo galay bad raad raace

Dalkii nabad lagu raysan jiray yaa u rogay ciida

Yaa dowladnimada reer iyo ka dhigay qoliyo raas 

Yaa kala danbayntii radiyay oo sharciga raafay

Rabshadiyo ninkee bow sababa qixiyo raad goynta

Yaa raqiis ka dhigay dhiig muslime rubada wiil  gooyay

Haween iyo kolay tahay ragaba yaanan kala reebin

Yaan maxasta reentiyo ciyaal biday rafaad xoog leh

Rajadii bulshada iyo ninkii jabiyay ruugooda

Yaa rahan u dhigay qaranka iyo rayskii gobolkeena

Suaalaha is daba raacayiyo doodu waa rarane

 Radiyowgu wuxuu tabinayay wada riyaaqeene

Barbaarkaa radiyay hadal yaroo buuqa raaridaye

Wuxuu yiri raggii hore dalkay naga radeebeene

Naga rare naqiyo roob di iyo meel ramaas badane

Raq walaal dushiisay fureen reerkii beelaha e

Rash dhacaya maantiyo baqaha roor galinaaya

Kow  nimankii riday bow sababa shalay rajiimkiiye

Iyagoo run iyo balan dhiganin bay soo rarsheen gulufe

Kama tagin rikoor qura hantidii wada rasaysnayde

Xafiisyada risaaladu dhextiil ruufiyaan mariye

Raasumaalkii yaalay gurteen ruux kastoo galaye

Ruugcadaagii baa yiri jawaab aad u raro wayne

Wuxuu ra yigu kaama xuma waa rujaal hadale

Dalku rabadinkuu yiil haddaan anigu raad gooyay

Oon qarankii raaxada lahaa galin rasaaseeyay

Adiguba rashkii waad wadaa kama roonaane

Riximkiyo midkii kuuu xigaad buur ka ridaysaaye

Ribo iyo mar laaluush xun baad rodol u siibtaaye

Rugtii aan ku aan ku lumay baad hadana wali dhex roortaaye

Aduunyada dayaxa loo rogmaye racaba meel joogo

Oo tiknoolajiyad raadariyo yaal ramuud hagaya

Qabyaalada rakiban waa waxaad nagaga reebteene

Raqay beer asaagiin intaa rubuc yar tuugtaane

Roolkiinii mee dhalin yaroow waa racfaan furane

Ragaadkii cidhbaha idin ka muday soo rid qorigiisa

Ra yi mida intaad qaadataan olole raadceeyA

Dib usoo rafaca xaal aduun laysma raaciyo e

Haddii kale rajada aad tihiin raali ku ahaada

Raashin dhacay intaad tuugsataan reer galbeed bariya

Riixdeeda xira qaranimaan gaar wax loo rarane

Rinji calan u mari qol qolaad raas hub wayn tahaye

La raqlee magaalada war xumo beeni raad ma lehe

U rabaayadaysnoow fikrado aadan wali ruugin

Ninkastana wuxuu rabo adiga haku raacdayto

Afartaa ra iyo wowga dood risaal ah dheh

Murti roggan gabay aan rakibay run iyo maah maah dheh

Hadduu ramagu cabo goor kalaa lagu rakaadshaaye

Sadex kalana talada aan ratibay oo rogaal celisa

Si kastooy u raagtoo waxbadan lagu rafaad qaado

Riyadii lagu sugo waa danbay dhab u rumawdaaye

Wixii raaxo loo helo dhakhsaday raaci fooraha e

Rukun aan xal loo helin ma jiro rayska duunyada

Shay kastaba rabiga qaadir ah daawo roon galiye

Riig ninkii ku dhaca xarig yaraa loogu raaricine

Markaasuu rafkiyo kaga baxaa raran gubyoodkiiye

Ri kastaba shilinkii ay gashaa raali loo qaline

Ruqadaan danteed garan cidlay ku rawaxaysaaye

Ruuxaan tacab khasaarine ma helo guusha raad ka lehe

Sanadiyo indheer bay rintaa lana rigaaxdaaye

Intaad roondo dirataan saqdhexe toosh la daba roora

Raxanreebka iyo geedihiyo roobka qabawgiisa

Samir kaga ruqaansada jidkiyo raranka hoos yaala

Rabbi tuuga ducadiyo saliga qaar iskaga reeba

Markaad rayska gaadhaan ilaah raacsha mahadiisa

 

Dhamaad.